A escritora viguesa María Alonso viaxa este xoves 20 de abril ás 20:00 até a Libraría NUMAX para nos presentar o seu libro Transmigrantes. Fillas da precariedade, editado por Axóuxere. No acto participará tamén a filóloga e investigadora Manuela Palacios.
A directora arxentina Milagros Mumenthaler, cuxo novo filme, La idea de un lago, ten a súa estrea en salas de todo o Estado o 7 de abril da man de NUMAX Distribución, será a segunda protagonista do ciclo «A cor das palabras. Encontros con cineastas», organizado polo Concello de Compostela en colaboración co Cinema NUMAX. Baixo o título «Murmurios visíbeis» Mumenthaler fará un percorrido aos seus procesos creativos que conflúen sempre nun mesmo lugar: a inquietude por representar o íntimo. A aula terá lugar o sábado 8 de abril ás 11:30.
Este mércores 5 de abril a partir das 19:00 terá lugar unha nova sesión do «Tac, tac, tac» que a Libraría NUMAX celebra cada mes cun escritor ou escritora que, tras escribilo en directo, deixa o seu texto mecanografado na mesa situada ao pé do escaparate. Nesta ocasión será o chairego Xabier P. Docampo o protagonista da actividade, aberta a calquera que se achegue á libraría NUMAX.
Tes entre 18 e 25 anos e manéxaste ben co inglés? Gústache compartir nas redes as túas impresións sobre o cinema? Soñas con poder ir ao Festival de Venecia con todos os gastos pagados? Se cumpres estas condicións ofrecémosche a oportunidade de vivir unha experiencia única. O Cinema NUMAX vén de ser designado por Europa Cinemas, o Parlamento Europeo e o Festival de Venecia como a sala española encargada de seleccionar a tres candidatas a participar nun dos festivais máis importantes do mundo. O proceso rematará coa elección, por parte do certame, da persoa finalmente elixida como embaixadora no festival.
A carteleira do Cinema NUMAX acolle a partir deste venres 17 de marzo a estrea de Parábola del retorno, Premio NUMAX Exhibición na última edición do Festival Márgenes. Asinado polo director colombiano Juan Soto, o filme reflexiona sobre a convulsa historia recente do seu país a partir da figura do exiliado.
Afeito a camiñar polo lado zurdo da vida, o poeta Víctor M. Díez publicou Todo lo zurdo na Colección Buccaneers de Varasek Ediciones. Asubiando a súa canción libremente improvisada estará acompañado o martes 14 de marzo ás 20 na Libraría NUMAX polo músico Bernardo Martínez.
(Fotografía: José Ramón Vega)
