Do 26 de novembro ao 30 de decembro de 2024 temos unha cita semanal ineludible coa Retrospectiva Lionel Rogosin, o ciclo máis completo para descubrir o gran documentalista norteamericano. A primeira sesión será con Sobre o Bowery, o martes 26 ás 19:50h, coa presenza de Michael Rogosin, fillo do cineasta.
A libraría NUMAX acolle a presentación do libro Contos gringos (Galaxia Editorial) de Lara Dopazo Ruibal o xoves 21 de novembro ás 19h00. A autora estará acompañada polo xornalista e escritor Alberto Mancebo. A entrada é libre ata completar aforo.
A libraría NUMAX acolle a presentación do libro Enciclopedia perplexidade (escolma poética 1976-2023) de Antón Reixa o mércores 20 de novembro ás 19h00. O autor estará acompañado pola escritora Ledicia Costas e o músico Nuno Pico. A entrada é libre ata completar aforo.
Estamos moi felices de sermos unha das salas de presentación de Prefiro condenarme, quinta longametraxe da catedrática, escritora, cineasta e socia de NUMAX, Margarita Ledo Andión. A primeira cita será o sábado 23 de novembro ás 19:45h, nun pase que terá presentación e coloquio coa directora e para o que xa podedes reservar praza na nosa web ou en billeteira.
Por terceiro ano consecutivo, e en colaboración con A Reixa Tenda e o Outono Códax Festival, acollemos o ciclo Blow Up. A música no cinema, con tres sesións nas que gozaremos de This Is A Film About the Black Keys, o título de culto de Brian de Palma Phantom of the Paradise e o anime xaponés Blue Giant. O ciclo celebrarase do 22 ao 24 de novembro.
A poeta María do Cebreiro presentará o próximo sábado 16 de novembro o seu libro Los ojos de los árboles, un proxecto literario desenvolvido grazas a unha bolsa Leonardo de Investigación Científica e Creación Cultural da Fundación BBVA. Tras unha breve presentación, cunha repartición gratuíta de exemplares do libro e un set de carbóns de debuxo, farase un paseo literario e artístico pola natureza—dirixido a un público diverso cunha chamada especial para o público infantil— desde a Alameda a Vista Alegre. Esta publicación conta coa colaboración co Museo de Historia Natural da USC e NUMAX, responsable da produción editorial do libro, no que tamén participou o estudio Cenlitros, a experta en botánica Elena Páez e a fotógrafa Tamara de la Fuente. Actividade de aforo limitado, require de inscrición.
