PARTE DO EQUIPO NUMAX CO GALARDÓN DOS PREMIOS DA CULTURA GALEGA 2016
O socio e responsábel do Cinema NUMAX Ramiro Ledo destacou na súa intervención «o sobreesforzo produto da ilusión compartida para sacar adiante o proxecto» e agradeceu o apoio de avalistas, abonadas, cooperativas e visitantes.
Baixo o lema Un conto nun lugar nun límite de tempo o escritor Suso de Toro deseña para a Libraría NUMAX unha orixinal actividade literaria. Unha vez ao mes, un escritor ou escritora do noso panorama literario escribirá a máquina un texto que só poderá ser lido no espazo físico da Libraría. A presentación da actividade terá lugar o mércores 1 ás 20:00 h na Libraría NUMAX coa presenza de Suso de Toro e Margarita Ledo, que falará do seu proceso creativo. A entrada é aberta.
Estreas, filmes restaurados e traballos de vangarda fidelizan un público que atopa na súa visita ao Cinema NUMAX o valor engadido dunha libraría con identidade propia con máis de 5.000 volumes.
A filósofa e escritora Rebeca Baceiredo estará na Libraría NUMAX o próximo venres 27 de xaneiro ás 20:00 para presentar Oiko-nomía do xénero. Relato das clausuras, acompañada da escritora Teresa Moure e de Roberto Abuín, de Axóuxere Editora.
