Mañá xoves, 20 de febreiro, arrinca un novo ciclo en NUMAX que se irá desenvolvendo ao longo dos meses e que ten como obxectivo recuperar a obra de mulleres fundamentais na creación da linguaxe do cinema. Pioneiras ten como primeira protagonista a extraordinaria directora Lois Weber, de quen proxectaremos a curta Suspense (1913) e a longametraxe A mancha (1921).
O primeiro encontro A cor das palabras de 2025 ten como convidado a Pablo Gil Rituerto e a súa película documental La marsellesa de los borrachos, que segue os pasos dunha viaxe clandestina realizada en 1961 polo grupo Cantacronache que recolleu cancións populares de resistencia en pleno franquismo. A aula, co título Historia a contrafío: montaxe, memoria e relato, terá lugar o sábado 1 de marzo ás 12:00h con acceso gratuíto até completar aforo. Tamén haberá presentación da película na sala e actuacións de Faia e O Leo na Libraría.
Comezamos cun novo formato para os nosos clubs de lectura! Cada mes organizaremos sesións independentes e poderedes inscribirvos a cada unha delas individualmente. As persoas que as conducirán tamén mudarán, nalgúns casos seremos nós mesmas, noutras serán editoriais ou profesionais de diversos ámbitos. Será sempre o mesmo día da semana: os martes ás 20:00h. Aquí van as nosas tres primeiras sesións de marzo coordinadas por NUMAX, e as editoriais Irmás Cartoné e Rodolfo e Priscila!
A Libraría NUMAX acolle a presentación de Eu son o monte (Euseino?) de Sara Guerrero o xoves 27 de febreiro ás 19:30h. A autora estará acompañada do escritor Carlos Negro e de Inma Otero Varela, filósofa e padroeira da Fundación Euseino?. A entrada é libre ata completar aforo.
A Libraría NUMAX acolle a presentación de Cantos do mar (Morgante) de Susana Rodríguez Barcia e Bosco Gil de Gárate o venres 21 de febreiro ás 19:00h. As autoras estarán acompañadas do cantante e escritor Xurxo Souto. A entrada é libre ata completar aforo.
O xoves 20 de febreiro ás 19:00h a Libraría NUMAX acollerá a presentación de Memórias em Movimento: História e Trauma nos Cinemas Ibero-Americanos (IUC). No evento estarán dúas das persoas que coordinaron o libro, Iván Villarmea e Silvana Mariani, así como Andrea Franco, autora dun dos capítulos. A entrada é libre ata completar aforo.
