Achéganse das vacacións de Nadal e en NUMAX non nos esquecemos das máis pequenas da casa, cun programa especial de Petís NUMAX. Programaremos, en primeiro lugar, unha selección de Curtametraxes de Buster Keaton (sábado 21 e luns 23 de decembro) e descubriremos o talento de Ub Iwerks (domingo 22 e martes 24), un dos grandes pioneiros dos cartoons clásicos de animación a quen se lle atribúe a creación do personaxe de Mickey Mouse.
O ciclo A cor das palabras, organizado polo Concello de Santiago e NUMAX, pecha 2024 cun dos grandes nomes do cinema galego actual. O ferrolán Alberto Gracia afondará no proceso creativo do seu filme La Parra nun encontro que leva por título «A imaxe que pensa» e que terá lugar o sábado 21 de decembro ás 12:00h.
Na súa xira por España, a escritora cubana Elaine Vilar Madruga fai unha parada na Libraría NUMAX para presentar El cielo de la selva (Lava) o vindeiro sábado 21 de decembro ás 20:00h. A autora estará acompañada da actriz e escritora Iria Pinheiro. A entrada é libre ata completar aforo. Actividade en colaboración con Patasdepeixe Editora e Mona Produtora.
Temos unha sorpresa para ti! O vindeiro xoves 19 de decembro ás 20:15h acollemos a preestrea de La guitarra flamenca de Yerai Cortés, debut na dirección do músico Antón Álvarez, máis coñecido como C. Tangana. O evento contará cun coloquio posterior á proxección con C. Tangana que será emitido vía streaming na nosa sala. Entradas xa á venda en web e billeteira.
A Libraría NUMAX acolle a presentación de Los hechos de Key Biscayne (Anagrama) de Xita Rubert o vindeiro xoves 19 de decembro ás 20:00h. Este libro é, xunto con Clara y confusa de Cynthia Rimsky, o galardoado co 42.º Premio Herralde de Novela. A autora estará acompañada do escritor Brais Lamela. A entrada é libre ata completar aforo.
O escritor e xornalista Daniel Salgado presenta Poemas realistas (Apiario) na Libraría NUMAX o vindeiro mércores 11 de decembro ás 20:00h. O autor estará acompañado da editora Antía Otero e do escritor Alberto Lema. A entrada é libre ata completar aforo.
