Aínda sen asimilar por completo todo o que perdemos co falecemento de Jean-Luc Godard (1930-2022), desde NUMAX queremos ofrecer durante esta semana a nosa pequena homenaxe ao director suízo con tres obras clave da súa filmografía: Vivir a súa vida, La Chinoise e O libro de imaxes.
«Palabras tomadas» é o título escollido para a terceira conversa de «É un falar». Esta actividade terá lugar o mércores 21 de setembro ás 20:30 da tarde e reunirá na Libraría NUMAX ao narrador oral Celso Fernández Sanmartín e ao tradutor e poeta Fruela Fernández. Esta actividade está apoiada pola Deputación da Coruña e conta coa colaboración do Instituto da Lingua Galega.
A escritora brasileira Thayane Gaspar Jorge estará o venres 16 de setembro ás 20:00h na Libraría NUMAX para presentar a súa novela «Nossa concha de retalhos» editada por Menino Morreu. No acto a autora estará acompañada da poeta Arancha Nogueira e do editor Ângelo Pineda. A entrada é libre ata completar aforo.
O vindeiro xoves 15 de setembro ás 20:30 da tarde a Libraría NUMAX acollerá a presentación da obra debut «Avelaíñas eléctricas» de Sica Romero. No acto a autora estará acompañada de Ángel Suanzes, xornalista e escritor. A entrada é libre ata completar aforo.
Un ano máis somos sede do programa de cinema do WOS Festival, con dúas sesións o sábado 10 e domingo 11 de setembro. O festival compostelán de referencia para a cultura alternativa e de vangarda achegaranos a músicos de culto como Matthew Herbert e Éliane Radigue e traerá á nosa sala ao director Xabier Erkiza para presentar unha obra de experimentación audiovisual sobre o son que emiten os carros de bois.
O novo Foco de NUMAX presenta o cinema de Márta Mészáros, pioneira do cinema húngaro que conta cunha obra tan suxestiva como descoñecida no noso país. Arrancamos o martes 6 de setembro con Adopción (1975), o primeiro Oso de Ouro na Berlinale gañado por unha muller, que contará con presentación de Víctor Paz, impulsor da distribuidora Lost&Found con quen organizamos o ciclo.
