«O que queda na retina» é o título da aula que a directora de fotografía Lucía Catoira Pan ofrecerá o domingo 13 de decembro ás 11:30, dentro do ciclo de encontros con cineastas A Cor das Palabras que organiza o Concello de Santiago en colaboración con NUMAX. Para asistir, a entrada é de balde pero é preciso enviar un correo a [email protected], indicando nome completo e número de contacto.
A pantalla do cinema NUMAX homenaxeará entre o 1 e o 29 de decembro ao director estadounidense Jules Dassin, un dos grandes autores do cinema negro, coa proxección das súas cinco pezas máis célebres, dirixidas entre 1947 e 1955: Forza bruta, A cidade espida e Mercado de ladróns, feitos durante a súa etapa americana, e Noite na cidade e Rififi, rodados en Reino Unido e Francia, durante o seu exilio europeo.
O artista plástico Misha Bies Golas presentou unha conferencia performativa dentro do ciclo Discursos en Acción titulada "Contar pezas". Esta "memoria oral dunha catalogación", en palabras do propio artista, chega agora en forma de resumo e cunha pequena conversa.
Este venres 13 unímonos á celebración do Día das Librarías co 5% de desconto en todos os libros e coa sinatura da última novela de Suso de Toro, que xusto chegará á nosa libraría, acabada de saír do prelo, o xoves 12. Entre as 19h e as 20h do venres o escritor estará na nosa libraría.
Continuamos coa programación do ciclo A Cor das Palabras, que organiza o Concello de Santiago de Compostela en colaboración con NUMAX. Este domingo 22 de novembro ás 11:30 acolleremos a aula do produtor, director e guionista Luis López Carrasco, baixo o lema «Repetir o irrepetible. Formas cinematográficas para reconstruír a Historia».
O martes 10 de novembro ás 10h, no marco das actividades do Festival de Sevilla terá lugar a presentación de PROMIO, rede de cinemas independentes, en cuxa fundación participou activamente o Cinema NUMAX.
