Un ano máis por estas datas compartimos as listaxes cos mellores filmes de 2022 para as traballadoras da cooperativa. No máis alto da listaxe atopamos unha das grandes sensacións da tempada —Alcarràs—, a volcánica Fire of Love, o documental de arquivo Regreso a Reims; a última de Paul Thomas Anderson —Licorice Pizza— ou a máis recente e aínda en carteleira Aftersun. Velaquí as listaxes completas.
A nova alfaia do coreano Hong Sang-soo ten un premio moi especial! Ao presentar a túa entrada no acceso á sesión de A novelista e o seu filme recibirás de agasallo un marcapáxinas de edición limitada que dá dereito a un 5% de desconto nas túas compras da Libraría NUMAX. Unha oferta en colaboración con Atalante Cinema válida até o 31 de xaneiro.
A ilustradora madrileña Patricia Bolaños, autora do libro New York is the thing, editado por Mont Ventoux, realizará firma de exemplares e retratos en directo durante a tarde do sábado 17 de decembro a partir das 18h00 no espazo da libraría. Esta visita enmárcase dentro dunha xira por España na que tamén visitará cidades como Madrid, Valencia, Ourense, Barcelona e A Coruña.
Do 13 de decembro ao 10 de xaneiro poderemos descubrir de primeira man o apaixonante traballo de Jean Rouch, a figura máis relevante do documental etnográfico e pai do cinéma verité. Ao director francés dedicarémoslle 5 sesións con documentais gravados entre os anos 50 e os 70 en Costa de Marfil, Malí, Níxer, Ghana e a propia París. O pase inicial de Eu, un negro + Os amos tolos contará con presentación do profesor e programador Julio Vilariño (Cineclube de Compostela).
Esta publicación, comisariada por Suso de Toro, é o resultado da actividade literaria "Tac tac tac" desenvolta por oito escritores e escritoras na libraría NUMAX durante o ano 2017. Esta novidade de Xerais, unha edición numerada e limitada, reproduce os textos mecanografados, apuntes e fotografías, que sairon daquela experiencia, xuntando as obras de Margarita Ledo, Manuel Rivas, Xabier P. DoCampo, Marina Mayoral, Susana Sánchez Aríns, Pedro Feijoo, Xabier Queipo e de Suso de Toro.
O sábado 26 de novembro ás 17:40 celebramos un pase especial do documental 10 de marzo, que rememora o Proceso dos 23 de Ferrol cuxas manifestacións de protesta remataron co asasinato de Amador Rey e Daniel Niebla. O acto contará con presentación e coloquio a cargo do historiador Víctor Santidrián e o produtor Emilio J. Fernández.
Foto: Fundación 10 de marzo
