O xoves 24 de xaneiro ás 20:00 a Libraría NUMAX acollerá unha conversa sobre a historia do deseño en Galicia e arredor do libro Máis que ver. Cen historias do deseño na Galiza. Participarán o autor da obra, Pepe Barro, e os deseñadores de NUMAX X.Carlos Hidalgo e Antonio Doñate.
O mércores 16 ás 20:00 a Libraría NUMAX acollerá a presentación do documental Vértice de versos. Participarán Carlos Lorenzo (director e produtor do documental), Baldo Ramos (poeta, artista plástico e un dos protagonistas do documental), Eduardo Estévez (poeta que intervén no documental) e Xoán Curiel (músico, autor da banda sonora do documental). No acto proxectaranse fragmentos da peza.
O luns 14 de xaneiro o xornalista e poeta César Souto presentará o seu último poemario, Campo aberto. Participarán o xornalista Anxo Quintela e o director xeral de Galaxia, Francisco Castro.
O luns 14 e martes 15 de xaneiro arranca en NUMAX Tempada de arte, un estimulante ciclo de filmes rodados en 4K que nos achegan ás grandes figuras da historia da arte. D'Os nenúfares de Monet á vida e a obra de Van Gogh, Degas, Picasso, Leonardo, Klimt, Schiele e Rembrandt.
Recén rematado 2018 continuamos facendo repaso do máis salientábel do ano, desta volta cos filmes que máis gustaron ás traballadoras de NUMAX. Entre as máis repetidas atópanse The Florida Project, Call Me by Your Name, Entre dos aguas, Viaje al cuarto de una madre ou Lazzaro feliz.
No noso balance do ano destaca a consolidación do programa didáctico NUMAX na Escola para centros de ensino de primaria, secundaria e bacharelato, con máis de 3.000 asistentes ás proxeccións.
