O Cinema NUMAX participará do 29 ao 31 de xaneiro no IFFR Live, unha anovadora proposta desenvolvida polo Festival Internacional de Cinema de Rotterdam (IFFR), que permitirá aos espectadores de distintas salas de toda Europa asistir de xeito simultáneo a catro filmes de estrea proxectados no certame holandés.
O fotógrafo coruñés Manuel Sendón visita NUMAX para presentar Espantallos, o seu último traballo. O acto terá lugar na Libraría NUMAX o vindeiro xoves 21 de xaneiro a partir das 20:00, e contará coa presenza do propio Manuel Sendón, acompañado do antropólogo Marcial Gondar e do historiador da arte Federico L. Silvestre.
O cineasta catalán José Luis Guerín visita NUMAX para presentar, este sábado 9 de xaneiro ás 19:40, o seu último filme, La academia de las musas. Ao remate da proxección, Guerín manterá un coloquio co público asistente.
O venres 8 de xaneiro ás 20:00 presentaremos en NUMAX, coa presenza do autor, o poemario de debut de Fran Gayo, Cadena de frío, que acaba de publicar a editora de Xixón Suburbia Ediciones na colección malas tierras.
O vindeiro xoves 17 de decembro ás 20:00 terá lugar en NUMAX o acto de presentación do novo libro de María do Cebreiro, 'O deserto', que vén de saír do prelo da man de Apiario Editora. Aparte da propia autora intervirán Antía Otero e a crítica Manuela Palacios.
Con ocasión da estrea en NUMAX de África 815 organizamos un encontro coa súa directora, Pilar Monsell, este sábado 12 de decembro ás 19:45. Estará acompañada pola profesora de cinema, guionista e programadora Cátia Salgueiro, con quen manterá un coloquio aberto ao público logo da proxección do filme.
