Coa chegada do novo curso reanudamos as proxeccións do ciclo Os ollos verdes. O cinema inédito de NUMAX coa última creación da talentosa cineasta chilena Dominga Sotomayor: Tarde para morir joven. O estudantado da USC pode acadar 1 crédito ECTS coa asistencia ao ciclo grazas ao acordo coa Universidade de Santiago de Compostela.
Xunto coa peza audiovisual Aproximaciones abstractas, verticales. Segunda versión, que se proxectará a partir do xoves 5 de setembro no Cinema NUMAX previa á proxección do filme Ray & Liz, Diego Santomé ocupará a vitrina da Libraría cun elemento que fala do carácter histórico deste tipo de espazos, pero tamén da súa investigación como artista. Así, o cineasta Eloy Enciso cede para este Episodio #03 o seu galardón do Boccalino D’Oro, que estará dentro deste espazo en conflito que representa a vitrina na arte. A peza cerámica, producida industrialmente, afonda tamén na idea que da título ao episodio: Do caolín de Burela ao Rosa Tokio. O martes 10 de setembro ás 20:00 agardámosvos para a presentación do episodio, coa presenza do artista e do comisario do ciclo, Ángel Calvo.
Continuamos descubrindo a obra de grandes autores da historia do cinema co Foco Pier Paolo Pasolini, un programa composto por 6 filmes fundamentais para entender a un dos maiores creadores do cinema moderno. Desde o martes 3 de setembro en NUMAX.
Por quinto ano consecutivo o WOS Festival x SON Estrella Galicia vívese en NUMAX. O festival compostelán de referencia para a cultura alternativa e de vangarda achéganos a figuras de culto da música contemporánea como Ryuichi Sakamoto ou John Zorn, xunto ao filme galego 7 limbos. O programa, deseñado polo socio de NUMAX Marcos Flórez, terá lugar os días 12, 13 e 14 de setembro.
[FOTO: Sandra Alonso]
O mércores 14 de agosto ás 20:00 recibimos unha nova visita da poeta de Foz Luisa Castro para presentar La fortaleza. Poesía reunida (1984-2005), un volume que recolle por vez primeira os seis libros de poemas da escritora. O acto estará presentado polo poeta e tradutor Ismael Ramos.
O mes de agosto ten un gran protagonista en NUMAX: Jonás Trueba. O talentoso director madrileño volve visitarnos para acompañar a estrea do seu novo filme, La virgen de agosto. Aproveitando o acontecemento proxectaremos durante todo o mes de agosto un Foco coa obra case íntegra do cineasta.
