Desde o día de hoxe, venres 13 de marzo, no Cinema NUMAX aplicaremos unha redución do aforo da sala e o número de sesións diarias en coherencia coas recomendacións das autoridades sanitarias. Ademais, queda adiada a visita de Stefano Savona, director d'A familia Samuni, así como o seu encontro A cor das palabras programado para o sábado 14.
O xoves 12 ás 20:00 horas a libraría NUMAX acolle a presentación de Regina & Celeste, una correspondencia de Celeste González e Regina Fiz. A presentación correrá a cargo de Celeste González e Carlos Rodríguez, editor de La uÑa RoTa.
O venres 6 de marzo o Cinema NUMAX terá como gran protagonista a cineasta portuguesa Salomé Lamas, unha das creadoras máis inquedas e anovadoras do cinema luso, a quen xa coñeceramos na presentación de El Dorado XXI e Terra de ninguem. As actividades coa directora portuguesa contan coa colaboración de Estraperlo Editora, Intersección. Contemporary Audiovisual Art Fest e o Consello da Cultura Galega.
Estamos moi felices de anunciar a retrospectiva á obra do director brasileiro Kleber Mendonça Filho, un dos autores máis suxestivos do cinema mundial. As proxeccións terán lugar os luns do mes de marzo e culminarán coa visita do cineasta de Recife na preestrea do seu último filme, Bacurau. A restrospectiva inclúese no noso ciclo Os ollos verdes e conta coa colaboración de Vitrine Filmes.
Todos os domingos ás 11:30 da mañá as máis pequenas da casa teñen unha cita co mellor cinema para crianzas en Petís NUMAX. Unha estupenda iniciación na sétima arte que combina alfaias da animación contemporánea con grandes clásicos da comedia (Chaplin, Keaton, Tati). A actividade ten tarifa reducida para menores de 13 anos e entradas gratuítas! Pide xa a túa tarxeta Petís na nosa billeteira.
O encontro A cor das palabras organizado polo Concello de Santiago en colaboración co Cinema NUMAX contará cun convidado moi especial. O profesor, teórico e cineasta Paulino Viota debullará o cinema de John Ford a partir da análise d'A lexión invencíbel. O encontro leva por título A herdanza do cinema, historia das formas, e terá lugar o sábado 29 de febreiro ás 11:30 no Cinema NUMAX. Reservas en [email protected].
