O venres 29 de xuño ás 20:00 a actriz, escritora e artista Helen Bertels presenta unha acción artística moi especial que precisa da vosa colaboración e se desenvolverá na Libraría NUMAX o sábado 30 de xuño e o domingo 1 de xullo.
O martes 26 de xuño ás 20:00 a Libraría NUMAX acolle a cuarta peza de Fóra dos museos, coa exhibición da Cabuxiña de Castelao, unha obra de Cerámica Celta que constitúe unha das escasas incursións do autor no eido da escultura. A partir da pregunta Que acontece coa arte do exilio? Xosé Carlos Valle, director do Museo de Pontevedra, e Sabela L. Pato, comisaria da actividade, conversarán sobre o repertorio artístico no exilio nas coleccións e museos galegos. O acto conta co apoio da Área de Cultura da Deputación da Coruña.
A deseñadora e ilustradora coruñesa Bea Lema presenta na Libraría NUMAX O Corpo de Cristo, novela gráfica gañadora do XII Premio Castelao da Deputación da Coruña. No acto, que terá lugar o mércores 20 de xuño ás 19:00, Lema estará acompañada pola responsábel da área de Cultura da Deputación, Goretti Sanmartín. (Imaxe: Pablo Santiago)
Chega á Libraría NUMAX un dos libros do ano no panorama literario galego, especialmente acaído e urxente para os tempos que corren. Contra todo isto. Un manifesto rebelde contará coa presentación do seu autor, o escritor e xornalista Manuel Rivas, acompañado por Manuel Bragado (Xerais), a escritora Rosa Aneiros e o alcalde de Santiago, Martiño Noriega.
Desde a Libraría NUMAX estamos moi felices de acoller a presentación do libro Marcas na paisaxe. Para unha historia do cinema en lingua galega, editado polo Grupo de Estudos Audiovisuais e a Editorial Galaxia baixo a coordinación de Margarita Ledo Andión. Será o martes 12 de xuño ás 20:00.
Última cita antes do verán co ciclo A cor das palabras. Encontros con cineastas, organizado polo Concello de Santiago en colaboración co Cinema NUMAX. O escritor, dramaturgo e cineasta Eugène Green viaxa a Compostela para manter un encontro co público de NUMAX baixo o título «Presenza real no cinematógrafo», ademais de presentar o seu novo filme, Agardando os bárbaros.
