A libraría NUMAX acolle a presentación do libro Enciclopedia perplexidade (escolma poética 1976-2023) de Antón Reixa o mércores 20 de novembro ás 19h00. O autor estará acompañado pola escritora Ledicia Costas e o músico Nuno Pico. A entrada é libre ata completar aforo.
Estamos moi felices de sermos unha das salas de presentación de Prefiro condenarme, quinta longametraxe da catedrática, escritora, cineasta e socia de NUMAX, Margarita Ledo Andión. A primeira cita será o sábado 23 de novembro ás 19:45h, nun pase que terá presentación e coloquio coa directora e para o que xa podedes reservar praza na nosa web ou en billeteira.
Por terceiro ano consecutivo, e en colaboración con A Reixa Tenda e o Outono Códax Festival, acollemos o ciclo Blow Up. A música no cinema, con tres sesións nas que gozaremos de This Is A Film About the Black Keys, o título de culto de Brian de Palma Phantom of the Paradise e o anime xaponés Blue Giant. O ciclo celebrarase do 22 ao 24 de novembro.
A poeta María do Cebreiro presentará o próximo sábado 16 de novembro o seu libro Los ojos de los árboles, un proxecto literario desenvolvido grazas a unha bolsa Leonardo de Investigación Científica e Creación Cultural da Fundación BBVA. Tras unha breve presentación, cunha repartición gratuíta de exemplares do libro e un set de carbóns de debuxo, farase un paseo literario e artístico pola natureza—dirixido a un público diverso cunha chamada especial para o público infantil— desde a Alameda a Vista Alegre. Esta publicación conta coa colaboración co Museo de Historia Natural da USC e NUMAX, responsable da produción editorial do libro, no que tamén participou o estudio Cenlitros, a experta en botánica Elena Páez e a fotógrafa Tamara de la Fuente. Actividade de aforo limitado, require de inscrición.
Un ano máis, e xa van nove, no Cinema NUMAX estamos moi felices de participar da 38ª edición do Festival Cineuropa, da que seremos sede do sábado 9 ao xoves 21 de novembro. A partir do venres 22 recuperaremos as nosas estreas habituais. Velaquí toda a info dos pases de Cineuropa en NUMAX.
NUMAX súmase á iniciativa internacional posta en marcha en solidariedade co festival Palestine Cinema Days que, desde o 7 de outubro do ano pasado, non pode celebrarse en terras palestinas pero atopa acubillo en 171 pantallas repartidas por todo o mundo. No noso caso, proxectaremos o filme The Wanted 18 (المطلوبون ال 18) o sábado 2 de novembro ás 12h, nun acto presentado por Mª Soliña Barreiro, profesora de Comunicación Audiovisual e colaboradora da iniciativa.
