Este mércores 9 de abril ás 19:40h celebramos un evento único coa proxección do filme Mes amis espagnols, con presentación e coloquio a cargo do seu autor, o cineasta suízo Adrien Bordone, xunto a Jesús Martínez e Domingo Rial, dous dos protagonistas da cinta. O filme chega á nosa pantalla tras gañar o premio a Mellor Filme na Sección Panorama do Festival de Ourense.
A Libraría NUMAX acolle a presentación de Chyntia Menéndez, Son coma glaciares os barcos de aceiro (Galaxia), o venres 11 de abril ás 19:00h. A autora estará acompañada da escritora Antía Otero. A entrada é libre ata completar aforo.
A Libraría NUMAX acolle a presentación de Conta, Sherezade (Xerais) de Suso de Toro o mércores 9 de abril ás 19:00h. O autor estará acompañado da crítica literaria Ana Salgado e do editor Fran Alonso. A entrada é libre ata completar aforo.
Os martes do mes de abril terán como gran protagonista a un dos maiores xenios da historia do cinema: Jean Renoir. Do director francés proxectaremos 4 obras mestras pertencentes a diferentes etapas da súa extensa filmografía. Arrancamos o martes 1 de abril c'O crime do Señor Lange que se inclúe tamén nas actividades de celebración do 10º Aniversario da cooperativa.
A Libraría NUMAX acolle a presentación de Os médicos tamén enferman (Alvarellos) de Martiño Noriega o xoves 10 de abril ás 19:00h. O autor estará acompañado da médica de cabeceira, Flora Miranda, e o editor Herique Alvarellos. A entrada é libre ata completar aforo.
A cooperativa NUMAX cumpre 10 aniños e, para celebralo con todas vós, temos organizada unha semana de actividades que arranca o domingo 30 de marzo e culmina cunha xornada de portas abertas o sábado 5 de abril na que haberá música, cinema, talleres, actividades para crianzas e moito máis. Contamos contigo!
