Marcos Abalde (Vigo, 1982) presentará na Libraría NUMAX o seu último libro, Exhumación, co que vén de gañar o Premio Manuel Lueiro Rey. O acto terá lugar o xoves 22 de setembro ás 20:00.
(Imaxe: Sandra Alonso)
O cineasta e escritor Alberte Pagán (O Carballiño, 1965) visita a Libraría NUMAX para presentar o seu libro de relatos Percorridos por unha teoría do desexo. A cita é o xoves 15 de setembro ás 20:00 horas.
(Fotografía: Óscar Fernández Orengo)
Setembro é o mes de Pedro Costa en NUMAX. O gran cineasta portugués presentará os días 23 e 24 de setembro a súa nova obra mestra, Cabalo Diñeiro, estreada en salas de toda España por NUMAX Distribución. O sábado 24 ás 11:30, Pedro Costa impartirá a Aula «Os ollos verdes» na que fará un percorrido pola súa traxectoria artística.
Un ano máis o Cinema NUMAX súmase ás actividades do WOS Festival, un evento que se celebra en distintos espazos da cidade, dedicado á cultura alternativa e de vangarda. Seguindo esta liña deseñamos un programa conxunto entre WOS Festival, Curtocircuíto e NUMAX que inclúe a proxección, os días 6, 7 e 8 de setembro, de tres filmes musicais nos que Nick Cave, Fred Frith e Mark Reeder serán os grandes protagonistas.
O Cinema NUMAX recibe o sábado 27 de agosto ás 19:50 a visita de Eloy Domínguez Serén, un dos expoñentes máis importantes do Novo Cinema Galego. O cineasta de Simes (Meaño, Pontevedra) presentará en sala unha das súas últimas creacións, No Cow on the Ice, que terá súa estrea absoluta en cines o mércores 24 de agosto en NUMAX.
Desde o pasado mes de xuño NUMAX consume enerxía de orixe exclusivamente renovábel tras asociarse á cooperativa de consumo catalá Som Energia para o seu subministro eléctrico. Deste xeito, NUMAX ratifica o seu compromiso coas enerxías limpas e o desenvolvemento sostíbel ao tempo que estreita os seus lazos con iniciativas de orixe cooperativista.
