O Cinema NUMAX acollerá durante a mañá do sábado 23 de marzo o curso “Eu sei nutrirme”, onde, da man de Álvaro Vargas, técnico superior en Dietética, coach nutricional e autor de varios libros sobre nutrición, poderás aprender de xeito sinxelo e práctico en que consiste unha alimentación saudábel para o día a día.
O martes 19 de febreiro teremos na Libraría NUMAX a Isaac Xubín para presentar a súa última novela, publicada en Galaxia. Será ás 20:00 e o autor estará acompañado por Ismael Ramos, poeta e coordinador de novos proxectos da editora.
O mércores 6 de febreiro ás 20:00 o escritor Suso de Toro presenta Dentro da literatura acompañado do editor de Xerais Fran Alonso, do deseñador gráfico X. Carlos Hidalgo, do profesor Jose Manuel González Herrán e do escritor Manuel Quintáns Suarez.
O ciclo A Cor das Palabras, organizado polo Concello de Santiago en colaboración co Cinema NUMAX, regresa neste 2019 coa visita dun dos grandes talentos do Novo Cinema Galego: Diana Toucedo. Aproveitando a estrea en salas da súa primeira longa, Trinta lumes (desde o 8 de febreiro en NUMAX), Toucedo convídanos a viaxar polo proceso artístico da súa obra nun encontro titulado «A fraxilidade dos vagalumes ou como desvelar o invisible no visible». A cita é o domingo 10 de febreiro ás 11:30 horas con entrada de balde.
Fotografía: Adrián González
O mércores 13 de febreiro ás 20:00 na Libraría NUMAX Marcus Daniel Cabada presenta Metafísica da ausencia (Urutau Editora), acompañado do editor Wladimir Vaz. Participarán tamén os poetas Antón Lopo, Carlos Lixó e Arancha Nogueira.
O vindeiro 29 de xaneiro arranca o Foco Kenji Mizoguchi, unha selección de oito obras mestras restauradas que nos achegan a un dos meirandes autores da historia do cinema. Un acontecemento único que terá lugar no Cinema NUMAX até o 28 de maio en colaboración coa distribuidora Capricci.
