Co inicio do novo curso académico xa temos preparada a reanudación do programa «Os ollos verdes. O cinema inédito de NUMAX» que neste 2018-2019 conta coa gran novidade de que todos os pases serán gratuítos. Se estudas na USC podes acadar 1 crédito ECTS asistindo a 12 sesións ao longo do curso. Arrancamos o luns 17 de setembro con A ciambra, premio Europa Cinemas en Cannes 2017.
A fermosa Virxe Inmaculada de alabastro policromado do século XVIII que ata o 9 de outubro se expón na Libraría NUMAX serviranos de escusa para falar da arte sacra e os museos en Galicia, dentro do ciclo Fóra dos Museos. Esta quinta cita terá lugar o próximo martes 18 de setembro e nela participará o que fora director do museo do Castro de Viladonga, ata a súa xubilación en 2014, e director xeral de Patrimonio Cultural entre 2005 e 2009, Felipe Arias Vilas, xunto a Sabela L. Pato, comisaria da actividade.
A xornalista Helena Capera entrevistará na Libraría NUMAX á escritora catalana Marta Pessarrodona para achegarnos á súa traxectoria literaria e feminista. A cita será o mércores 19 de setembro ás 20:00.
En NUMAX estamos moi felices de volver participar do WOS Festival, celebración anual da cultura alternativa e de vangarda. O WOS Cinema x NUMAX, que conta co patrocinio de Gadis, terá lugar os días 12, 13 e 14 de setembro coa proxección de tres filmes que participan das experiencias musicais máis arriscadas, do postpunk ao free jazz pasando pola música experimental. A programación e presentación das sesións corre a cargo do socio de NUMAX Marcos Flórez.
Marcapáginas, de Maider López, dentro do programa HPC de consonni, propón un proxecto para a edición en castelán de Vídeo Green de Chris Kraus e xorde dunha cita do libro («Hai un fetichismo conectado cos obxectos nesta clase de coleccionismo amateur (...) O obxecto crea un lazo entre a súa orixe e o coleccionista»). A partir desta idea do fetichismo dos obxectos, a proposta de López consiste en colleitar recordos que diariamente usamos como marcapáxinas. Podes participar deixando os teus na caixa do correo de recollida que temos instalada en NUMAX até o 25 de setembro inclusive.
A gran retrospectiva á obra de Danièle Huillet e Jean-Marie Straub que vimos celebrando en NUMAX desde comezos de ano, terá o mellor dos colofóns posíbeis. Baixo o título «Quei loro incontri (Eses encontros con eles)», temos a honra de recibir a visita do cineasta portugués Pedro Costa e o profesor e actor italiano Giorgio Passerone.
