O dramaturgo e director teatral Afonso Becerra estará en NUMAX o próximo xoves 7 de outubro ás 19:30 para a presentación do seu libro História da dança contemporânea na Galiza (Através Editora, 2021). No acto o autor estará acompañado de Ana Vallés e Baltasar Patiño (Matarile Teatro).
O arquitecto e contador de historias Pedro Torrijos visitará a Libraría NUMAX para a presentación do seu libro Territorios improbables (Kailas Editorial, 2021). No acto, que terá lugar o próximo mércores 6 de outubro ás 20:00 da tarde, o autor estará acompañado do historiador da arte e divulgador Miguel Ángel Cajigal, coñecido en redes sociais como El Barroquista.
Xa está aquí o catálogo renovado para o curso 2021/22 de NUMAX na Escola, a nosa proposta de proxeccións didácticas para o alumnado de infantil, primaria, secundaria e bacharelato. Escolle o filme ideal para o teu alumnado e escríbenos a [email protected] para acordar a sesión.
Neste mes de setembro a Libraría NUMAX realiza a súa segunda saída á rúa para levar á Biblioteca Ánxel Casal a presentación do libro La fuerza de los débiles (Akal, 2021) do escritor e activista Amador Fernández Savater. O acto será o venres 24 de setembro ás 19:30 no Salón de Actos. Xunto ao autor estará o profesor e investigador Germán Labrador. Colaboran a editorial Akal e o colectivo Emerxencia Cultural Ourense.
A Libraría NUMAX sae á rúa do 10 ao 14 de setembro participando na SELIC cun posto situado na rúa do Vilar. Ademais, somos as organizadoras da conversa entre o investigador Alberto Berzosa e o profesor da facultade de Belas Artes de Pontevedra Xosé Manuel Buxán arredor da escena cinematográfica underground na España dos anos 70 e 80. Será o luns 13 ás 17:30 na sede de Afundación.
Co regreso do curso lectivo retomamos o noso ciclo Os ollos verdes que, neste arranque de outono, inclúe a estrea de filmes inéditos en salas españolas e retrospectivas como a de Aki Kaurimäki. Recorda que se estudas na USC e te anotas ao ciclo gozarás de tarifa reducida e poderás obter 1 crédito ECTS.
