A ilustradora e deseñadora Marie G. Rohde presenta Monstruos verdaderos amenazan al planeta (Zahorí de Ideas) este sábado 30 ás 12:30 na libraría NUMAX. Rohde, sueca afincada en Barcelona, ten traballado para grandes marcas internacionales como Uniqlo, Tiffany, Macy’s ou Condé Nast. O seu interese innato pola mitoloxía e o medio ambiente levárona a publicar este seu primeiro libro.
As últimas semanas do ano chegan cargadas de sorpresas ao ciclo Os ollos verdes. O cinema inédito de NUMAX, coa proxección en pases únicos de obras de culto (Cando fomos bruxas), agardados títulos da tempada (Liberté, Love Me Not, Letters to Paul Morrisey) e a presentación en sala, a cargo de Adán Aliaga, de El cuarto reino.
A sesión dobre Varda / Akerman coa proxección dos seus últimos e extraordinarios traballos virá precedida dunha clase maxistral en NUMAX de Diana Toucedo, realizadora dunha das máis fermosas longametraxes do ano pasado, Trinta lumes, e tamén montadora e docente excepcional na Universidade Pompeu i Fabra e na ESCAC, onde actualmente está ao cargo do departamento de Documental/Non-ficción. Diana analizará estes dous filmes e, por extensión, o cinema de dúas das cineastas máis importantes (do xénero que sexa) da historia do cinema. Será o domingo 17 ás 12:00.
O sábado 30 de novembro ás 19:00 Anxo Rabuñal, José Luis Gallero e Martí Peran presentan na Libraría NUMAX Escribir y dibujar, en el fondo, no son lo mismo, unha obra que explora a dimensión plástica da escritura no marco da pintura do século XX.
Un ano máis, o Cinema NUMAX súmase á programación da 33 edición do Festival Cineuropa como unha das sedes do certame. Unha variada proposta co mellor cinema de autor da tempada que proxectamos do 8 ao 18 de novembro.
Unha conversa entre a artista e o comisario, Ángel Calvo, este martes 5 de novembro ás 20:00 inaugurará a cuarta mostra do ciclo Episodios de Creación Contemporánea. Carla Filipe encherá a nosa vitrina con roupas femininas, farrapos e pezas de costura que afondan na memoria dun pasado no que cada detalle cotián afectaba a vida diaria e era controlado polas mans que, á súa vez, desenvolvían moitas outras tarefas.
